PAGHAHANDA ng Philippine national athletes para sa darating na 31st Southeast Asian Games sa Hanoi, Vietnam ang isa sa tatalakayin ni Philippine Team delegation sa Vietnam SEAG Chef de Mission Ramon ‘El Presidente’ Fernandez sa pagbisita nito sa “Usapang Sports’ ng Tabloids Organization in Philippine Sports, Inc., Huwebes.
Hihimayin ni Fernandez, nagsisilbi rin bilang Philippine Sports Commission (PSC) commissioner, sa weekly sports forum alas-10 ng umaga via Zoom at livestream sa TOPS official Facebook page at YouTube ang estado at ginagawang preparasyon ng Philippine Team na puntiryang madepensahan ang overall title sa biennial event sa Mayo 12-27.
Magugunita noong 30th SEA Games na ginanap sa bansa, humakot ng kabuuang 387 medalya, 149 ginto ang mga atletang Pinoy para sa overall crown.
Samantala, eeksena rin sa programa na suportado ng PSC, Games and Amusement Board (GAB) at Pagcor si National University athletic director Rustico ‘Otie’ Camangian na ibabahagi ang paghahanda ng kanilang student-athletes sa inaasahang pagbabalik ng Universities Athletics Association of the Philippines (UAAP) ngayong taon.
Tatalakayin rin ni Camangian sa sports forum ang nakatakdang paghampas ng NU men’s volleyball team sa 20th ASEAN University Games sa Hulyo 26 hanggang Agosto 6 sa Ubon Ratchathani sa Thailand.
Date: February 17, 2022 | By: Janiel Toralba | Newspaper: Abante | Source: https://www.abante.com.ph/fernandez-hihimayin-seag-sa-tops-forum/
